ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᐃᑲᔪᕐᓯᒪᔪᑦ ᒥᑦᑎᒪᑕᓕᒻᒥ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᐱᔾᔪᑎᖃᕐᑐᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒪᕐᒥᐅᑕᓕᕆᔨᒃᑯᖏᑕ ᓚᐃᓴᓐᓯᖓᓂᒃ ᐅᖁᒪᐃᓐᓂᖃᑎᑦᓯᓂᕐᒧᑦ ᐃᓱᓕᓯᒪᓂᖃᕐᑎᓪᓗᒋᑦ 25 ᑕᓐᔅᓄᑦ ᖃᓕᕋᓕᓐᓂᒃ ᖃᐅᔨᓴᕐᑕᐅᖁᓪᓗᒍ ᓯᑯᒃᑯᑦ ᐃᖃᓪᓕᐊᕈᓐᓇᑐᐃᓐᓇᕆᐊᖃᓂᖅ Eclipse Sound,ᒥ. ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᑐᓂᓯᕙᑦᑐᑦ ᓂᒃᓯᓂᒃ, ᐊᑦᓱᓈᓂᒃ ᐃᖃᓗᓐᓂᐊᕈᑎᓄᑦ, ᐊᐅᓚᐅᑎᓂᒃ ᐊᔪᕐᓯᓯᒪᓂᕐᒧᑦ, ᐊᒻᒪ ᐊᓯᖏᓐᓂᒃ ᓱᓇᕐᕈᑎᓂᒃ ᐃᑲᔪᕈᑎᒋᓪᓗᒋᑦ ᐃᖃᓗᓐᓂᐊᕐᓂᕐᒧᑦ.
ᐃᖏᕐᕋᓂᐅᓚᐅᕐᑐᖅ ᕿᒥᕐᕈᒋᐊᖃᓂᕐᒧᑦ ᓂᐅᕕᐊᒃᓴᓕᐅᕆᐊᒃᓴᖅ ᐊᖏᔫᖏᑦᑐᓂᒃ ᖃᓕᕋᓕᕆᓂᒃᑯᑦ ᒥᑦᑎᒪᑕᓕᒻᒥ. ᐱᓇᓱᐊᕐᑐᑦ ᕿᒥᕐᕈᓚᐅᕐᑕᖏᑦ ᐅᑯᐊ: ᓯᑯᒥᒃ ᐊᒻᒪᐃᒍᑏᑦ, ᖃᒧᑏᑦ, ᖃᑦᓯᓂᒃ ᐃᖃᓗᒍᓐᓇᕐᓂᖅᖅ, ᓇᕆᐊᖏᑦ, ᐸᕐᓴᓇᐃᕐᑕᐅᓂᖏᑦ, ᐊᒻᒪ ᐊᑐᐃᓐᓇᐅᔪᑦ ᓱᓇᕐᕈᑎᖏᑦ. ᐃᖃᓪᓕᐊᕐᓂᖅ ᖃᐅᔨᒍᑕᐅᔪᖅ ᓱᓇᒋᐊᓪᓚᓐᓂᒃ ᐱᓕᕆᒋᐊᖃᓂᕐᓯᒃ ᓯᓄᓂᐅᓂᐊᕐᑐᒥ. ᐃᖃᓗᓕᕆᔪᑦ ᐃᖃᓗᓚᐅᕐᑐᑦ ᓴᓂᐊᓂ 26 ᐃᖃᓗᓐᓂᒃ ᐅᓪᓘᓐᓂ ᒪᕐᕉᓐᓂ. ᐅᓄᖏᑦᑐᓂᒃ ᐃᖃᓗᖃᑦᑕᕈᑕᐅᓯᒪᒻᒪᑦ ᐃᒃᑲᓗᐊᕐᓂᖅ ᐱᔾᔪᑎᒋᓪᓗᒍ., ᐅᓄᖏᑦᑐᓂᓪᓗ ᐃᖃᓗᖃᑦᑕᕐᓂᖅ, ᐊᒻᒪ ᐊᑐᐃᓐᓇᖃᖏᓐᓂᖅ ᖃᐅᔨᒪᔭᐅᔪᓂᒃ ᐃᒪᐅᑉ ᐃᖅᑲᖓᑕ ᒥᒃᓵᓄᑦ.
ᑭᖑᓂᐊᓂ ᐃᖏᕐᕋᓚᐅᕐᑎᓪᓗᒋᑦ, ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᐊᑐᐃᓐᓇᖃᓕᓚᐅᕐᑐᑦ ᑐᑭᓯᒋᐊᕐᕕᒃᓴᓂᒃ ᓇᑎᕆᒐᔭᕐᑕᖓᑕ ᒥᒃᓵᓄᑦ ᐊᒻᒪ ᐅᓪᓗᒥ ᐱᓕᕆᐊᖃᕐᑐᑦ ᑲᑎᑎᕆᓂᕐᒥᒃ ᑐᑭᓯᒋᐊᕐᕕᒃᓴᓂᒃ ᓄᓇᓐᖑᐊᓄᑦ ᐋᖅᑭᒃᓱᕐᓱᒋᑦ.
ᐱᓕᕆᐊᖑᔪᒃᑯᑦ ᑐᕌᒐᖃᕐᑐᑦ ᐊᑲᐅᓂᕐᐸᐅᒋᐊᕐᑐᒥᒃ ᐃᓂᒃᓴᖓᓂᒃ ᐊᒻᒪ ᖃᖓᒃᑯᑦ ᐃᖃᓗᒐᓱᐊᖃᑦᑕᕋᔭᕐᓂᕐᒥᒃ, ᐊᒻᒪ ᓈᒻᒪᑦᑐᓂᒃ ᖃᓕᕋᓕᑦᑕᕐᓂᒃᑯᑦ, ᐋᖅᑭᒃᓱᐃᓗᑎᒃ ᑲᓇᑕᒥ ᐃᒪᕐᒥᐅᑕᓕᕆᔨᒃᑯᓐᓄᑦ ᐊᖏᕐᑕᐅᓯᒪᔪᓂᒃ ᐱᓕᕆᒍᓯᕐᓂᒃ, ᐊᒻᒪ ᐃᖃᓗᑦᑕᖏᑦ ᓂᐅᕕᐊᒃᓴᕈᖁᓪᓗᒋᑦ. ᑭᖑᓂᐊᒍᑦ ᐋᖅᑭᒃᓱᐃᓕᕐᒥᓗᑎᒃ ᖃᒧᑎᓕᕆᕕᒃᓴᓂᒃ, ᐃᑲᔪᕈᑕᐅᓂᐊᕐᑐᓂᒃ ᖁᐊᕐᑕᕐᑎᓪᓗᒍ, ᐊᑭᓖᓐᓂᒃᑯᑦ ᐃᖃᓪᓕᐊᕐᑎᓂᒃ ᖃᓕᕋᓕᓐᓂᒃ ᓯᓈᓂ, ᐊᒻᒪ ᐸᓇᓇᐃᔭᐃᓂᒃᑯᑦ ᐴᕐᑐᐃᓂᒃᑯᑦ ᓂᐅᕕᐊᒃᓴᓂᒃ. ᑕᒪᒃᑯᐊ ᐱᑐᐃᓐᓇᐅᖏᑦᑐᑦ ᑲᒪᒋᔭᐅᔭᕆᐊᓖᑦ ᐊᕐᕌᒍᒋᓂᐊᕐᑕᑦᑎᓐᓂ, ᐋᖅᑭᒃᓱᐃᓂᖅ ᐊᑯᓂᐅᓂᕐᓴᐅᑐᐃᓐᓇᕆᐊᖃᕐᓱᓂ.
ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᓯᕐᓗᐊᖃᕐᑐᑦ ᓂᐅᕕᐊᒃᓴᓕᐅᕐᕕᒻᒥᒃ ᖃᓕᕋᓕᓐᓂᒃ. ᑕᒪᒃᑯᐊ ᐴᕆᔭᐅᕙᑦᑐᑦ ᐊᐅᓪᓚᕐᑎᑕᐅᓚᐅᕐᑐᑦ ᒥᑦᑎᒪᑕᓕᒻᒧᑦ ᐅᒍᓯᑎ 2019,ᒥ.
ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᓱᓕ ᖃᐅᔨᓴᐃᓐᓇᕐᓂᐊᕐᑐᑦ ᒥᑭᓂᕐᓴᓂᒃ ᐅᒥᐊᕐᔪᕐᑖᕆᐊᒃᓴᖅ ᐃᑲᔪᕈᑕᐅᒐᔭᕐᑎᓪᓗᒍ ᓯᓈᓂ ᐃᖃᓐᓂᐊᕐᓂᕐᒧᑦ ᒥᑦᑎᒪᑕᓕᒻᒥ.
2018,ᒥ, ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᐃᖅᑲᓇᐃᔭᕐᑎᖓ ᒥᑦᑎᒪᑕᓕᒻᒥ ᐃᓪᓗᒥ ᐊᑐᕐᑐᐊᕈᓐᓇᕐᓯᓚᐅᕐᒪᑦ ᐊᓪᓚᕕᒻᒥᒃ ᓄᑖᒥ ᐃᓪᓗᒥ. ᐊᓪᓚᕕᑦ ᐊᑐᕐᑐᐊᕐᑕᐅᔪᑦ ᓄᓇᕗᒻᒥ ᒪᓕᖓᓕᕆᔨᒧᑦ, ᕿᑭᕐᑕᓂ ᐅᔭᕋᓐᓂᐊᕐᑎᓄᑦ, ᐊᒻᒪ ᐊᑕᐅᓯᕐᒥᒃ ᐊᓪᓚᕕᒻᒥᒃ ᑐᓂᔭᐅᓯᒪᓪᓗᑎᒃ SmartIce,ᑯᑦ ᐱᓕᕆᐊᖏᑦ, ᐊᒻᒪ ᕿᑭᕐᑖᓗᖕᒥ ᐃᖃᓗᓕᕆᔨᒃᑯᓐᓄᑦ ᐃᑲᔪᕐᓯᔭᐅᓯᒪᓪᓗᑎᒃ ᐊᒻᒪ ᐃᑲᔪᕐᑕᐅᕙᑦᑐᑦ.